…….الانتظام و المتابعه هما سر النجاح

 في الرياضه لازم يكون في مواعيد للتدريب و متابعه باستمرار عشان تخسي او عشان توصلي لمستوي معين من اللياقه وده مش بيحصل في يوم و ليله ….ده بياخد مجهود  شهور و تعب عشان النتيجه تكون مرضيه و كمان  تنظيم للوقت و المتابعه للحفاظ علي النتيجه

 اقتناعتي ؟؟؟

ما تيجي نعمل ده  في الاهتمام بالبشره  ……. ننتظم و نتابع و نعرف ان الخطوات اللي بنعملها يوميا هي اللي بتعمل نتيجه بعد شهر و بعد سنه و بعد خمسين سنه

جلدك اللي هو بشرتك ده جزء من جسمك و هو الغلاف الاخير و اخر حاجه بيوصلها الغذاء بعد ما كل الاجهزه في الجسم تاخد كفايتها

يعني  اي علامة تبان علي الجلد من بره ليها دلاله علي نقص حاجه في الجسم من  جوه  يبقي عشان جلدك و شكلك يبقي كويس لازم تبدأي من جوه لبره و بالترتيب كده

  •  ناكل اكل مغذي
  • نحرك جسمنا و نلعب رياضه عشان الدم ينقل الغذاء و الاوكسيجين لكل خلايا الجسم بما فيهم الجلد
  • نتعب شويه و نهتم بمنتجات العنايه بالبشره و طريقة استخدامها عشان ناخد افضل نتيجه

اساسيات  استخدام منتجات البشره

  • ازالة الماكياج استخدامي كريم او زيت مناسب مباشرة علي الوش بكميه كبيره عشان الجلد ما يشربهوش بسهوله
  • اعملي حركه دائريه بضغط خفيف عشان الكريم المنظف يدوب الماكياج حتي المضاد للمياه ويكون سهل تشيليه  بعد كده بقطنه
  •  استخدمي القطن الطبي لازالة الكريم المنظف لانه ناعم علي الجلد و مش بيعمل  تجريح للبشره خصوصا الناس اللي بشرتهم حساسه
  • اغسلي وشك بعد كده بغسول مناسب لنوع بشرتك
  • نشفي وشك بفوطه  بضغط خفيف عشان الفوطه تمتص المايه الزياده وخدي بالك بلاش تشدي جلدك في اي اتجاه خصوصا و انتي بتنشفي ( باشوف البنات بتعامل وشها معامله وحشه قوي بالفوط ود بيزود التجاعيد  )
  •   وقت التونر جه ……تقدري تحطي منه نقطتين علي قطنه و تمشي بالراحه علي وشك و رقبتك و تستني لما ينشف و بعد كده تبقي جاهزه للمنتج اللي بعده
  • كريم العين ….. بتستخدميه كل يوم و بيتوزع بطريقة الطبطبه في شكل دايره حولين العظم بتاع العين
  • السيريم ….. المنتج المركز اللي استخدامه مش ضروري يكون يومي بيكون عن الضروره و بس ( مش كتر منتجات و طبقات و خلاص ) ……. هتستخدميه علي المناطق اللي محتاجه عنايه زياده و هي نقطه مش كتير و بطرف صوابعك تعماي دواير بضغط خفيف لحد ما الجلد يمتص السيريم كله
  • الكريم ….. سواء نهار او ليل  تقدري تستخدمي كميه مناسبه تساعدك تعما
  • اعملي ماساج لوشك لمده 3 دقايق او اكتر

  اهم خطوه  اللي معظم الناس بتنساها هي الماساج للاسف هي ابسط خطوه و اقلهم تكلفه و لكن اهميتها بكل الخطوات اللي فاتت و من غيرها ولا كاننا عملنا حاجه عشان

  •  بتساعد الجلد علي امتصاص الماده الفعاله عن طريق تنشيط  الدوره الدمويه
  • ونتيجة تنشيط الدوره الدمويه في الوش بنزود نسبة الاوكسيجين و بالتالي انتاج الكولاجين بيزيد بشكل طبيعي
  •  و كمان بتشد الجلد في عكس اتجاه التجاعيد وده بيقللها بشكل ملحوظ

النظام ده  عشان تبدأي تحسي بنتيجه هتبقي بعد اسبوعين و عشان يكون في فرق ملحوظ بعد شهرين و خدي بالك دايما ان اللي بنبنيه و نصلحه في سنه هيبوظ في شهر لو اهملتي زي عضلات البطن  تقعدي 6 شهور تشديها و لو اخدتي اجازه اسبوعين ولا اكنك عملتي حاجه

    دلوقتي بقي قوليلي ايه الحاجه اللي انتي محتجاها عشان تتشجعي و تبدااي من  النهارده ؟

Advertisements